Ka Teboho Moloi
BETHLEHEM- Ditho tsa mokgatlo wa barekisi ba mebileng ka hara teropo ya Bethlehem lekgotleng la motse la Dihlabeng (Dihlabeng Hawkers Organisation DHO) di tshoseditse ho isa lekgotla la motse lekgotleng la dinyewe.
DHO ere ba tlo nka mohato ona ho phephetsa qeto ya lekgotla la motse ebang otla tswelapele ho ba tlosa dibakeng tsa bona tsa tshebetso moo ba rekisetsang teng kahara teropo ya Bethlehem.
Masepala o satswa nehelana ka thlokomediso ho bona hore dicontainer tseo ba rekisetsang ho tsona, di lokela ho tlowa mobung wa masepala ka ha ba sena tumello hotswa masepaleng ho tswelapele ho rekisa (permits), ho sanatse maikutlo a ditho tsena hore masepala o hlolehile ho bafa mangolo a tumello hoka rekisa le ha ba entse dikopo.
Modulasetulo wa mokgatlo Thabiso Lengoabala o re masepala o kgetha nku ka pere hara barekisi hore o tjhaela monwana dikopo tsa barekisi babang le ho tlodisa tsa ditho tsa bona mahlo.
Lengoabala o re mehato ya bona ka makgetlo masepaleng ho etsa dikopo e nyopile.
Ditho tsa mokgatlo ona tsene di halefile di bonwe di ipiletsa kantle ho holo ya teropo ka la Labone lala 29 Pherekgong 2026, nakong eo kopano ya lekgotla la motse ene e dutsi semmuso holong ena.
DHO ere boipiletso bona ba bona ke holatela ditshosetso hore masepala otlo ba tlosa le ho nka thepa tsa bona mathwasong a kgwedi ya Hlakola February.”
Bothata bo boholo ke lefapha la ntshetsopele ya moruo masepaleng ona ele hore LED, dipermit tsa dikgwebo di nehetswe baahi batswang naheng tse ding mme rona re tlodisitswe mahlo,” Lengoabala.
Barekisi bana ba re ho se nehelwe dipermit tsena ho boyetse hoba tlodisa ka menyetla ya ho fumana thuso tsa di tjhelete hona masepaleng le makaleng a mmuso kaha hoba le permit ele engwe ya dipehelo.
Ha ditaba di sa le mothating ona masepala o qheletse ka thoko dipuo tsa barekisi bana ka lereng di hloka nnete ebile di sena motheo.
Mmuelli wa lekgotla la motse Tshediso Maitse o re masepala o nehelane ka thlokomediso esale nako ho barekisi bana le ho nehelana ka thuto ya boitjhoriso ka melwana ya teropo ho bohle barekisi.
Maitse o hanane le hore masepala o qheletse ka thoko dikopo tsa barekisi bana, kaha le hajwale o ntse o tswelapele ho amohela dikopo le ho di hlahloba.
“Nnete ke hore masepala ka mohato wa ona wa ho nehelana ka dipermit kamora ho lekola dikopa, o tlo nehelana ka dibaka tse loketseng bakeng sa barekisi ho sebeletsa ho tsona,” Maitse.
