Ka Teboho Moloi
QWAQWA- Maqheku le maqhekwana lebatoweng la bosupa motseng wa Makgalaneng ba re mohato wa masepala wa ho imolla kgatello ya motlakase o ba thathafalletsa bophelo, le ho ba kgutlisetsa mekgweng ya kgale, ebile o beha maphelo a bona kotsing.
Baahi bana ba re se ba qobelleha ho rwalla dibakeng tse kotsi lebitsong la hore feela ba kgone ho pheha le ho ikomosa haholo nakong ena ya sehla se batang sa mariha.
Ba re ba phela ka matswalo, ba tshoha hore ba ka nna ba hlaselwa ke dinokwane ha ba ntse ba rwalla, ho betwa, ekasitana le ho kenelwa matlung a bona kaha masiu ohle ba phela ka lefifi.
Nkgono Alice Mafokama o re bothata bona bo baka hore a sitwe hoja ka nako ho kenyeletsa ho nwa dithlare tsa hae hoya ka taelo ya dingaka.
“O tla makala, hore hoseng ha re itukisetsa ho tsoha motlakase o wele, re robetse o ntse o le siko, bohloko ke lokela ho ja pele ke nwa dipidisi, ke tla di nwa jwang ke sa ja?”
Mofokama o hlalositse hona ele ho bolawa ke mmuso. Baahi ba re mohato ona o ba qobella ho dula dihora tse ngata ba sena phepelo ya motlakase ka letsatsi kang, papiso le metse e mabapi eo ba reng baahi ba moo ba dula ba imonyamonya ka motlakase.
“Nakong eo o kgutlileng motsheare o re o ya qalella ho pheha-pheha le pele dipoto tseo tse ifo di reng di ya tjwatla o boyela o wela hape, ke bona bophelo bo re bo phelang. Haona ntho e nkutlwisang bohloko jwalo ka leqhekwana hore ke tsoha le ho robala ka lefifi,” ho eketsa Mafokama.
Elizabeth Tshabalala o qosa mmuso hore mohato oo wa bona wa ho imollo o kgetha nku ka pere kaha bona ba fumana motlakase dihora tse ka tlase ho hora tse tharo eseng hofeta tse nne ka letsatsi kang.
“Ke hobaneng re sa kukelwe nako e lekanang motlakase le ho fuwa motlakase dihora tse lekanang le metse e mabapi. Hona jwale re dula ka matswalo bosiu hore re se kenelwe, ka ho leleng boshodu ba dicable bo boyetse bo tutile le bona,”Tshabalala.
