Ka Emily Setona
QWAQWA – Ha lefatshe le itokisetsa kgwedi ya Phato, morupelli e moholo le hlooho ya Lefapha la Dipuo tsa Afrika Yunibesithing ya Freistata, Dr Elias Nyefolo Malete, o hlalositse hore Basotho ba tshwanetse ho utulla botjha kutlwisiso ya bona ka Mongwaha wa Sesotho, oo a reng ha o latele khalendara ya Gregoriane.
Puisanong e ikgethileng le The Guard, Dr Malete o hlalositse hore Basotho ha ba bitse selemo ka lentswe la selimo, empa ba se bitsa mongwaha.
“O tshwanetse ho utlwisisa phapang pakeng tsa mongwaha le selimo. Mongwaha ke selemo ka botlalo, athe selimo ke nako ya selemo sa selemo sa dipalesa, e leng spring,” ho boletse Dr Malete.
O re Mongwaha wa Basotho o qala ka kgwedi ya borobedi, e leng Phato. Ho qala ha Mongwaha ho tshwaya ho fihla ha selimo, nako e bontshang bophelo bo botjha le ho tsoha hape ha tlhaho.
Ho ya ka Dr Malete, nakong ya selimo, tlhaho e qala bophelo bo botjha.
Dihlahla le difate tse neng di lahletse makgasi nakong ya mariha di qala ho hlahisa dipalesa pele di beha ditholwana.
Dikokonyana tse neng di ipatile mobung nakong ya mariha di qala ho hlaha hape, athe dibopuwa tse neng di sa bonahale nakong eo le tsona di boela di bonahala.
O boetse a re kgwedi ya Phato e tsebahala ka meya e matla e thusang ho tsamaisa peo ya dimela le ho qhalanya peo hore bophelo bo bocha bo tswele pele.
Ka nako ena, diboko di fetoha dirurubele, e leng pontsho ya phetoho le ntlafatso ya tlhaho.
Dr Malete o hlalositse hore ena hape ke nako eo Basotho ba nkang mehoma ya bona ho lokisa masimo bakeng sa ho jala peo.
“Ho lokiswa ha masimo ke karolo ya bohlokwa ya ho amohela Mongwaha. Ke nako ya ho itokisetsa bophelo bo botjha le kotulo e tlang,” a rialo.
Le hoja borahisitori ba bang ba sa dumellane ka letsatsi le tobileng leo selimo le qalang ka lona, Dr Malete o re hangata mekete ya Mongwaha e qala ka la pele Phato.
O itse mekete ena e na le moelelo o tebileng wa teboho bakeng sa bophelo bo botjha le tshepo ya kotulo e ntle. Hape ke nako ya dithapelo tseo ka tsona Basotho ba kopelang pula hore peo e jetsweng e mele hantle mme e hlahise dijo tse lekaneng.
Dr Malete o re kutlwisiso ya Mongwaha wa Basotho e bontsha kamano e matla pakeng tsa batho, lefatshe le tlhaho, mme e tshwanetse ho fetisetswa melokong e tlang e le karolo ya lefa la setso la Basotho.
Ho feta moo, Lefapha la Dipapadi, Bonono, Setso le Boithapollo la Free State le tla keteka Basotho New Year (Mongwaha) Basotho Cultural Village e Maluti-a-Phofung ka la 1 Phato 2026, e le karolo ya ho hlompha le ho tsosolosa lefa lena la setso.
