Ka Teboho Moloi
BLOEMFONTEIN –Tonakgolo ya mehleng ya Free State Ace Magashule o re lekala la naha la botjhotjhisi NPA ha lena nyewe kgahlanong le yena.
Magashule o bolelletse mekgatlo ya ditaba hore nyewe ya bobodu le manyofo-nyofo ya marulelo a Asbestos, ya dimillion tsa diranta tse ballwang ho makgolo a mabedi le metso e mashome a mahlano e hlahletsweng kgahlanong le yena, ke tshenyo ya nako feela nakong eo ana hlaheletse lekgotleng le dinyewe Bloemfontein ka Labone lac20 Phato.
Magashule o buwile a phahamisitse phatla hore o tlo netefaletsa lekgotla le phahameng la dinyewe hore nyewe ena, e susumeditswe ke dipolotiki.
O buile a sa lobe letho hore hona le boitshunyakako ba naha ya America nyeweng ena mme seo, se tla totobatswa ke bopaki ba hae ka nako eo a fuwang monyetla wa ho teka bopaki ba hae.
Leha ho le jwalo Magashule mmoho le baqusuwa mmoho le yena ba kenyeletsang rakgwebo, mothusi wa hae wa mehleng Moroadi Cholota le babang, ba tla lokela ho ema dikgwedi tse nne hape pele ba kgutlela kgotla.
Moahlodi wa lekgotla le phahameng Philip Laubser, o kgutliseditse nyewe ena morao ho fihlela ka la 18 Pherekgong isao 2027.
Lekgotla le hanne kopo ya Magashule hore ho mamelwa ha nyewe ena ho qale ka Mmesa ele ho qoba ho kgutlisetswa morao kgafetsa ha nyewe.
“Diqoso tsena ke tse phehilweng feela mme di tshwana hantle le nyewe ya mo generale wa di-Hawks Khumalo le mokomishinara ya beheletsweng ka thoko Fani Masemola.
Ho se phethelwe ha nyewe ena ho re sitisa ho tsepamisa maikutlo a rona maphelong a rona le matsholong a ho iketela dikgethong tse tlang,” ho rialo Magashule.
