Ka Teboho Moloi
FICKSBURG- Seponesa sa Free State se netefaditse ha se fuputsa nyewe ya dipatlisiso(inquest) ho latela ho fumanwa ha setopo sa monna yasa tsejweng ya kabang dilemo tse 40 nokeng ya Mohokare eneng e jele ditlhokwa ka Sontaha 10 Motsheanong.
Setopo sena se fumanwe se tshwaseile dikutung tsa difate tse hohotsweng ke noka eneng e phophoma holatela dipula tse matla tse tsholohileng matsatsing a hofeta.
Mmuelli wa seponesa Lt Col Thabo Covane o re ditho tsa bona tsa seponesa tikolohong ya Ficksburg di tsebisitswe ke modisana ya neng a alositse mehlape kamora hore a elellwe setopo se tshwaseileng ka Moqebelo 9 Motsheanong.
Noka ena ya Mohokare e parola mahareng a naha ya Afrika Borwa le Lesotho, kantlenyana feela ho lekeishene la Meqheleng mme e sebediswa haholo ke bao ba tshelang ka dikgorwana tsa matsha ba sena ditokomane.
Seponesa se re letsholo laho ntsha setopo sena, le ile la lokela ho kginwa kaha diqwidi tsa seponesa di ile tsa tobana le diphephetso tse kenyeletsang lefifi kaha letsholo le qadile metsotsong e mashome a mabedi(18:40) pele ho otla hora ya bosupa mantsiboya hammoho le mothamo o hodimo wa metsi.
“Holatela kgefutso ya letsholo la ho ntsha setopo sena ka Moqebelo, ditho tsa rona tse rupelletsweng ebile di na le boiphihlelo, di ile tsa qalella hape kajeno, moo qetellong ba ileng ba atleha ho ntsha setopo metsotsong e mashome a mabedi pele ho hora ya bobedi motsheare,” Covane.
Mofu o fumanwe a apere overall e putswa(blue) a sena dieta maotong abile a sena le maqeba a bonahalang mmeleng.
Seponesa se ipiletsa ho mang kapa mang yaka bang le tlhahiso-leseding ka monna enwa ho itlhahisa leho ikopanya le mofuputsi wa nyewe Warrant Officer Mofolo wa seponesa sa Ficksburg nomorong tsa 082 301 9578 kapa ho letsetsa 08600 10111 le hoka etela MySAPS App.
