Ka Teboho Moloi
QWAQWA – Seponesa Free State le ha se dumela hore mafellong se tla atleha ho hlola ntwa kgahlano le ho ata ha dithunya tse seng molaong le mahlahlela hara metse seterekeng sa Thabo Mofutsanyana, se re leeto leo kela moepa-molelle-monyolosa thaba.
Sena ke ho sa natse ho atleha ho fumana dithunya tse pedi tikolohong ya Tseki, ketsahalong tse fapaneng tlasa matsatsi 14 feela kgweding e hodimo.
Ka bobedi ba belaellwa ke melata.
Seponesa se re hofihlela setjhaba se hloka tshabo hoba tlalehela ka batho ba nang le dithunya tse seng molaong metseng ya bona, ho tla nka nako hore ele seponesa ba tshware batho bao le ho tlosa dithunya tseo hara metse ya bona.
Mmuelli wa seponesa Warrant Officer Mmako Mophiring o re dithunya di sa le ngata tse matshohong a fosahetseng mme ho lokelwa ho tiiswe maqhama a setjhaba le seponesa bakeng sa lesedi ho fihlela dikatleho.
“Morao tjena se re hlokometse hore hona le tlwae empe e atileng ya diketsahalo tsa batho ba supang kapa ho tshosetsana ka tsona dithunya hohle metseng mona, ho sa kgathaletsehe hore ke tse molaong kapa tjhe,” Mophiring.
O ipileditse ho setjhaba hore se nehelane ka dithunya tsa bafu seponeseng ebang ho sena motho anang le lengolo la tumello hoka bana le sethunya.
O re ha hona molao o teng hore sethunya sa mofu ekaba lefa mme sa fitisetswa feela ho mang kapa mang a amanang le mofu, ntle le mangolo a tshwanetseng.
“Nnete feela ha re so be le katleho e nepahetseng moo reka ikotlant sefuba ra re re fumane dithunya tse seng molaong kapa dithunya tse seng molaong di tlohile matshohong a batho ba sa nepahalang, hoo ho sa tlo re nka dilemo,” Mophiring.
