Ka Teboho Moloi
QWAQWA-Banna ba nkile karolo kopanong ene e tshwaya keteko ya letsatsi la matjhaba la bo ntate, hoteleng ya mehleng ya Qwa Qwa ka Laboraro 19 Pudungwane tlasa tlhophiso ya mokgatlo wa Qholaqhwe Advice Center, ba tshwetse ka mathe diketso tsa tlolo ya molao tseo baqusuwa eleng banna.
Makgolo-kgolo a banna hotswa metseng e fapaneng ba ikanne hore diketso tsena di lokela ho emisa, mme le ho ikana hore ha diya lokela ho tswelapele tlasa mabitso a bona. Bo ntate ba kgothaleditswe ho qalella ho bua ka mathata a bona, diphepetso tseo ba tobaneng le tsona hona le ho dula ba ipipeditse ka mathata.
Hara dinthla tseo bankakarolo bane ba buisana ka tsona di ne di kenyeletsa hotla ka tharollo diphepetsong tseo bo ntate ba dilemo tsa hajwale ba tobanang le tsona.
Ba hlokomedisitswe ka bohlokwa ba bophelo bo botle, ho ikopanya ha bo ntate, ho tla ka tharollo diphepetsong tsa letsatsi ka leng, tekatekano ya bo mong.
Ba boetse ba hlokomediswa ka ho ata ha bo ntate ba nang le mahloko a kelello tikolohong ena le ho tlisa. Ba fana ka tlhaloso mahareng a hoba Ntate le Monna setjhabeng, ekasitana le ho fumana tharollo hoba nang le bothata ba tshebediso ya tai hara bo ntate e atileng.
Boholo ba bankakarolo ba hlalositse ha bana le ngongoreho ka boitshwaro ba bang ba bo ntate ba silafatsang lebitso la boholo ba bo ntate.
Ba seholotse diketso tsa dipeto, dipolayano, tlhekefetso tsa ka malapeng, ho se hodise bana le ho siya bana hohle hara metse ntle le ho nka maikarabelo a ho hudisa bana bao.
Modulasetulo wa mokgatlo wa bo ntate, Ahanang Mens Forum Pule Lekgwaba o seholotse ka bohale ketsahalo ya pelaelo ya peto kgahlano le monna-moholo.
