Ka Teboho Moloi
QWAQWA -Mokga wa bohanyetsi wa Democratic Alliance( DA ) ka hara setereke sa Thabo Mofutsanyana o otlantse thupa le lefatshe hore otlo ngolla letona la puso ya kopanelo le taba tsa marena, hoka kena dipakeng tsamaisong ya dikantoro tsa lekgotla la setereke la Thabo Mofutsanyana.
Sena hoya ka DA ke holatela ho tswelapele ha basebeletsi ba masepala, ho qobeleha ho sebetsa dihora tse nne ka letsatsi bakeng sa dilemo tse pedi tse fitileng ho fihlela hajwale.
Kopanong ya morao tjena ya kommiti ya tshebetso ho hlaheletse hape, hore basebeletsi ba masepala wa setereke sena ba iphumana ba lokela ho sebetsa dihora tse nne feela ka lebaka la thlokeho ya phepelo ya metsi le motlakase dikantorong.
Molekgotla wa DA seterekeng Leona Kleynhans o re maemo ana a tswelapele ho sa natse mohato wa ho ngongoreha ke mohlahlubi e moholo wa dibuka tsa ditjhelete (AG), ka tshebediso ya ditjhelete tankeng tsa metsi (JoJo), digenerator, mafura le matlwana a hloma o hlomolle.
“Maemo a hajwale a renang a baka mathata a phano ya ditshebeletso bakeng sa baahi ba hlokang dithuso ho tswa kantorong tsena tsa setereke,”Kleynhans.
Ha ditaba di sa le mothating ona, Kleynhans o re ba batla letona hotla ka tharollo ho latela ho thehwa ha metse ya bodulo e metjha e bonahalang e ropoha ka bongata ho potoloha le dikantoro tsa setereke, mme hona le pelaelo hore matlo ao a hoketswe metsi le motlakase ka tsela eseng moalong.
“Re boyetse re ngongorehiswa ke karolo eo setereke se e bapalang ho shebana le ntshetsopele ya metse, haholo kahara masepala wa Maluti A Phofung o ntse o sena mohlanka ya ikarabellang ‘town planner ‘,” ho eketsa Kleynhans.
