Ka Teboho Moloi
QWAQWA-Ba bang ba baahi ba karolo ya bone motseng wa Mandela Park lebatoweng la bo 35 ba inketse qeto ya ho beha maikarabelo a ho lokisa ditsela tseo ba reng di se di fetohile mangope le ho beha maphelo a bona kotsing.
Karolo ya baahi ba na e kenyeletsang bo ntate ba motse ona, ba re ba bone hole molemo ho kopanya matsoho ka ha Sesotho se re letshwele le peta pooho, ho ntsha tjhelete e kalo ka R140-00, ho reka majwe a tla sebetsa ho kata tsela tse senyehileng kahara motse wa bona.
Mmuelli wa baahi Kopane Mokhele o re maemo a mabe a senyehileng a ditsela tsa bona a thathafatsang maphelo a bona a letsatsi ka leng, a ba qobelletse ho nka bohato ho itukisetsa tsela tsena.
Mokhele o re ditsela tsena di bakile temalo makoloing a bona, ho kenyelleditse le makoloi a tshohanyetso, tsa mapato, bana ba sekolo ekasitana le tsa seponesa ho kena kahara motse.
O behile molato hoba pusong ka ho hloleha ho utlwela dillo tsa bona bakeng sa tukiso ya ditsela tsena le hoja ba tseba ka kotloloho ka tsona le ka moo di thathafatsang maphelo a bona.
Setho sa komitti ya lebatowa Mofou Makau o re bothata ba ditsela kahara lebatowa la habo ke ba dilemo-lemo ntle le tharollo kaha ho sena motho a ikitlahetsang ho nka maikarabelo hothusa setjhaba Sena.
Makau o re bothata ke hore lebatowa lena le arohane dikoto.
One Response
Rona mona Townview nerentshe di R800 hoihulela metsi hobane maspala wahana