Ka Teboho Moloi
QWAQWA- Botsamaisi ba sekolo se phahameng sa Mohato bo re bona le tshepo hore monongwaha se tlo fumana sephetho se kgahlisang sa sehlopha sa leshome.
Sena se latela ho se sebetse hantle ngwahola kamora ho fumana dipresente tse 68.5.
Sekolo se re boitukisetso ba sona bo qadile hang-hang maqalong a selemo sena sa dithuto, ele ho netefatsa hore haho morutwana atla salla morao ka mosebetsi wa hae.
Sekolo se satswa tshwarela barutwana bana ba sehlopha sa leshome ba 146 mokete wa ditumediso cultural house ka Laboraro 23 Lwetse, moo basebeditseng hantle ba ileng ba tlotlwa ka dikgau, mme moketeng oo hwa boyelwa hwa tshwarwa dithapelo le ho nehelana ka mantswe a dikgothatso.
Mesuwe ene kgabile ka dipurapera tsa bona tsa thuto le mabanta a supang bokgabane dithutong tsa bona, ha barutwana ba apere mmala ya sekolo, mmoho le boteng ba batswadi ba bona.
Ho ya ka mosuwe hlooho Lekhetho Mosikatsana, sepheo sa hore mesuwe e kgabe jwalo, ene ele ho kgothatsa barutwana bana ho sebetsa ka matla dihlahlobeng tsa makgaolakgang.
“Selemo se shweleng sa dithuto re bile le diphephetso tse ngata tse lebisitseng hose sebetseng hantle sephethong sa rona.
Empa selemo sena se hodimo ka barutwana ba 146 re entse tsohle, mme re na le tumelo hore batlo sebetsa hantle kaofeela ha bona,” ho rialo Mosikatsana.
Mosikatsana o re hara maano a bona, a kenyeletsa ho sebetsa mmoho le batswadi, baruti hammoho le ho nehelana ka dithuso tsa ho thoba maikutlo ka nako tsohle ho barutwana.
O re ba lekile ka hohle ho lukisa le kelello tsa barutwana ba bona le hoba thoba maikutlo kaha dihlahlobo di na le kgatello e kgolo ya maikutlo.
“Bophelong di nthla di tharo feela tse bakelang bana kgatello ya maikutlo, ka ho phethala eleng thlalano, lefu hammoho le dihlahlobo tsa makgaola tsa sehlopha sa leshome,” ho eketsa Mosikatsana.
Hara dibuwi tsa bohlokwa di ne di kenyeletsa moruti ya tsebisahalang Matebese Lakaje.
Ho bile le thapelo ya ho kgantshwa ha dikerese ele thapedi ya ho kopela barutwana kganya ho sebetseng hantle dihlahlobong tseo.
