Ka Teboho Moloi
QWAQWA -Ba bang ba batswadi ba barutwana ba sehlopha sa leshome sekolong se phahameng sa Lekgulo ba re ba letse ba sa bo hlotha bosiung ba Laboraro wa la 03 Phupjane, ba ipotsa dipotso di hana ho feela le ho tshohela polokeho ya bana ba bona ba kampong ya sehlopha sa leshome sekolong sa Lekgulo.
Sena ke kamora ho fumana mehala ho tswa sekolong, moo bana ba bona ba neng ba ba kopa hore batle ho tla ba lata ka lebaka la tshwaro eo ba reng ena le kgethollo, dithohako ebile ele e mpe.
Sehlopha sa batswadi bana se bonwe hoseng wa Labone 04 Phupjane sekolong moo ba reng ba ne ba batla ho fumantshwa tlhakisetso hotswa ho botsamaisi ba sekolo empa ba teya kalala.
Maditjhelete Mofokeng motswali wa morutwana sekolong o re o ile a qobeleha ho tla sekolong bosiu boo kamora ho fumana mohala hotswa ho ngwana, mme a mo fumana le ba bang ka dithotho tsa bona hekeng ya sekolo ba batla ho tsamaya.
“Re fihlile ba le moo ka bongata ba bona bana ba rona ba batla ho tsamaya kaha ba ile ba re letsetsa, empa ba ne ba sa kgone hore baka tswa moo qetellong ba ileng ba kgutlela ka meahong kamoo, mme ra nka qeto hore tlhakisetso hantle retla e fumana hoseng hona,” ho rialo Mofokeng.
O hlalositse ha bana ba boletse ha bothata bo qadile ha barutwana ba thuto tsa mahlale ba fihla mme ba tsa History ba laelwa ho tswa ka holong ho ba suthela.
E mong wa batswadi Palesa Mokoena o re pejana motlatsa mosuwehloho o qheletse ka thoko ditlaleo tsa tshwaro empe ya bana hoya ka bona, empa o potlakile ho qosa barutwana ka lereng hara bona baqolotsana.
“Mme eo o re ho bile le ho seutlwane (misunderstanding) ha taelo eo a nehalaneng ka yona nakong eo barutwana ba lekala la mahlale ba kenang empa ol a leka ho e rarolla, ha jwale re batla botsamaisi ba sekolo bo dule fatshe le rona batlo refa tlaleo e feletseng kaha bana ba ntse ba hana poleleo eo, “horialo Mokoena.
Ho hlaheletse hore ba bang ba bana ba bitswa ka mabitso a tletseng mahlapa le nyenyefatso hore ke di Baboon. Lefapha la thuto ha le so arabele dipotsong tsa lesedinyana lena, nakong ya kgatiso ya pampiri.
