Ka Teboho Moloi
QWAQWA -Mokomishinara wa lefapha la tlhabollo ya batshwaruwa Free State le Northern Cape Subashini Moodley o re lenaneo la bona la tlhaiso ya dijo ke batshwaruwa, ke karolo ya mohato wa ho ba thusa hore haba lokollwa ditlamong ba tsebe ho iphidisa.
Moodley o re ka ha hangata hona le phephetso hore motho ha a tswa tjhangkaneng a se fumane monyetla wa khiro ke bo ramosebetsi, ka hona ba fana ka tsebo hore ba kgone ho iphidisa ka bo bona le hose bolawe ke tlala, kaha tlala elaba qobella ho etsa tlolo tsa molao.
Morao tjena lefapha le nehelane ka dithuso tsa dijo tse hlahisitsweng ke batshwaruwa, ho mokgatlo wa bana wa setso wa INDONI tse kenyeletsang meroho, mahe le borotho.
Lefapha Free State lena le dipolasi tse tharo ditsheng tsa batshwaruwa tse kenyeletsang Goedemoed, Groenpunt le Grootvlei.
“Re fana ka tsebo ya hore ba sebedise mobu kapa lefatshe jwang ho jaleng le ho iketsetsa mosebetsi. Ba bang bana le tsebo ka ho sebetsa ka mahe mme ho kaba bobebe hore ba fumane mesebetsi ho ba hlaisi ba mahe,”
Moodley o ipileditse ho setjhaba ho ela hloko bohlokwa baho boyela ho amohela bao baseng ba hlabolotswe, hore baikutlwe ba amoheleile hape setjhabeng kamora ho phethela kahlolo tsa bona.
“Mosebetsi wa rona ke nnete ke ho kwalla, ho hlokomela batshwaruwa empa re boyetse re nehelana ka tlhabollo ho bona. Re ba thusa ka ditsebo, dithuto hore ba hlabolehe le ho phela le setjhaba hape,” ho tiisa Moodley.
O re lefapha lena le mananeo a mangata a thlabollo ele ho thusa batshwaruwa ho fumana monyetla wa bobedi.
