Ka Teboho Moloi
FICKSBURG- Lekgotla la dinyewe la magistrata Meqheleng le romeletse molaetsa o matla ho batludi ba molao le hore kennete letsoho la molao ka mehla le letelele, nakong eo le neng le ahlolela ditho tse nne tsa lequlwana la ditlokotsebe la SVK hammoho le mabeta dilemo tse ngata-ngata ntlwana tshwana bekeng ena ka Mantaha le Labobedi Phupu ka ho qolleha.
Ka Labobedi la la 07 Phupu lekgotla le ahlotse le ho kweba ditho tsa lequlwana lena tse nne kamora ho dula dilemo tse supileng ditlamong haesale di ne di llelwe ke ditshepe ka qoso tsa polao, ho hlokofatsa setjhaba, ho tshwara pooho ka dikgoka, ho otla ka maikemisetso a ho ntsha kotsi le boshodu.
Mojalefa George Mojakisane (29) o pharilwe ka dilemo tse 27 tjhangkaneng, Kamohelo Letokoto (31) o ahloletswe tse 18, Motlalepula Klaas (30) o nehilwe tse 18 hammoho le Nthodi Derek Moipatli (30) o nehetswe dilemo tse 18.
Boleleng ba nyewe lekgotla le utlwile ha mahareng a Phupu 2018 le Phato 2019 lequlwana le entse tlolo tse ngata tsa molao tse tletseng dikgoka ho potoloha le Meqheleng.
Ebile le utlwile hore Khathatsi Mohale (32) le Tebello Isaac Phali (33) baile ba bolawa ka nako eo.
Ke moqusuwa wa pele a fumanweng a le molato ka polao tse pedi.
Seponesa se netefaditse ha baqusuwa bana, ba ile ba hlokofatsa baahi ba bangata ditameneng, ho shashara baahi ba bang motseng ka di phafa ntle le mabaka pele mahlatsipa a mang a nkelwa thepa tsa bona.
Mojakisane o boyetse o fumanwe molato ka qoso tse hlano tsa ho otla ka maikemisetso ho ntsha kotsi le boshodu ha Letokoto ka tse pedi tsa ho otla ka maikemisetso a ho ntsha kotsi le boshodu le Klaas tse pedi tsa ho otla ka maikemisetso a hontsha kotsi le boshodu jwalo feela le Moipatli.
Mmueli wa seponesa Warrant Officer Mmako Mophiring o re ditho tse ding tsa lequlwana lena tse 14 haesale di ne di ahlolelwe kahlolo tsa ho hlola maphelo ohle a bona tjhangkaneng.
Ha ditaba di sale mothating ona ka Mantaha wa la 06 Phupu Suhla Nkola(28) o ahloletswe tjhangkaneng dilemo tse 25 bakeng sa peto ya ngwana wa sekolo a tlase dilemong, e etsahetseng ka selemo sa 2023 ebile ele moahisane wa hae.
Lekgotla leile la utlwa kamoo lehlatsipa leile la betwa ka teng nakong eo le neng le itukisetsa ho ya sekolong ho lo ngola di hlahlobo tsa mafelo a selemo.
Le utlwile bopaki hore lehlatsipa leile la ngola dihlahlobo tseo kamora ho hlekefetswa ka tsela eo ya motabo pele aka tlalehela seponesa mohla monene.
Mabeta enwa, o na itshuhlumetse dihoreng tsa hoseng phapusing nakong eo lehlatsipa lentseng le hlapa pele le leba sekolong le ho mobeta.
Ka ho qolleha nyewe tsena di ne di fuputswa ke Detective Sergeant Kobeli wa lekala la FCS le Detective Warrant Officer Mahlomola Mofolo ba seponesa sa Ficksburg SAPS .
