Ka Teboho Moloi
QWAQWA-Modulasetulo wa lekgotla la motse le dulang lele ditabeng ebile le hula ka boima la Maluti A Phofung Moeketsi Lebesa, o boletse ha ho bonahala boholo ba baahi ba metse e thehang lekgotla la habo ba ntse ba haellwa ke kutlwisiso ka lenaneo la IDP.
Lebesa o buwile sena ka Labobedi a le lebaleng la dipapadi sekolong sa Lekgulo, lenaneong la masepala la IDP le reretsweng ho nonya setjhaba maikutlo ka dithloko tsa bona malebana le phano ya ditshebeletso le ho fumana dithlaiso pele hoka etswa moralo wa ditekanyetso bakeng sa selemo se setjha sa ditjhelete.
Empa o dumellana hantle le maikutlo a renang hore dikopano tsena difetohile seboka sa hontsha ditletlebo le makukuno ka phano tea ditshebeletso ke setjhaba.
“Kennete ntate ho bonahala batho ba borona habaso utlwisisi hantle hore IPD ke eng. Kaha IDP ele mohato o latelwang pele mmuso oka etsa ditekanyetso tsa ditjhelete mme elokela ho ikamahanya le thloko tsa setjhaba,”Lebesa.
O re ho fihlile thlokomelong ya hae hore setjhaba hona le hore se fana ka dithloko tsa sona, se sebedisa nako eo ho ntsha dillo.
“Empa nnete feela ke hore rekase ba tshwaye phoso hoba hona le ntho tse ngata tse sa etsahalang ka hara metse ya bona ebile ele ditletlebo tsa selemo le selemo tseo esale badi tshepiswa,” Lebesa.
O tswahile molato ho bo radipolotiki le bahlanka ba mmuso ka hoba hole le setjhaba hoka tseba mathata le ho tla ka tharollo diphephetsong tsa sona.
Ha a qhelela ka thoko hore ke tlwaelo hore setjhaba setla ntsha makukuno a sona, hase bona boetapele ba masepala hona le molekgotla wa bona eo ba mo tlwaetseng.
Ha ditaba di sale mothating ona baahi ba tletlebile ka diprojeke tse so phethelwe ka hara lebatowa la bona la 08 tse kenyeletsang matlo, matlwana, tukiso ya ditsela le ho kwalla ha dikgeo tsa mesebetsi.
Ba supile mmuso ka monwana hore otla feela ho etsa ditshepiso tse sa phethahatsweng ka nako eo ho lebilweng dikgethong.
Baahi ba hatelletse hore ho ntse ho sena ponaletso khirong ya lenane la katoloso ya mesebetsi ya setjhaba (EPWP), le ho hanana le reporoto e tekilweng ya tse fihleletsweng selemong sena sa ditjhelete, ka lereng di hokae tseo tsohle.
