Ka Teboho Moloi
QWAQWA -Mopresidente wa mokga wa African Content Movement (ACM) Hlaudi Motsoeneng o amohetse molekgotla wa mehleng wa lebatowa la bo 19 Alex Mahlatsi semmuso ho tswa mokgeng wa Dikwankwetla Party of South Africa (DPSA) ka Laboraro 25 Hlakola lebaleng la dipapadi la Thaba Bosiu.
Motsoeneng o re mokga wa habo o sa tlo etsa phatlalatso ya balekgotla ba bang hape haufinyana ba tlo tshelela mokgeng wa habo ho potoloha le lekgotla la motse le Maluti A Phofung.
O re ho tshela ha Mahlatsi hotla mokgeng ona, ho latela ho bona nnete eo mokga ona oo emetseng ho tlisa diphethoho maphelong a baahi.
Ha tshetlehela ditho tsene di kgobokane lebaleng Thaba Bosiu Motsoeneng o ipileditse ho tsona ho netefaletsa hore ba ingodisitse le komishini ya dikgetho hoka nka karolo hoka kgetha dikgethong tsa monongwaha tsa makgotla a metse.
O seholotse ka bohale maemo a bophelo a baahi ba lebatowa lena hore le kajeno ba ntse ba hloka ditshebeletso tsa phano ya metsi kamora dilemo tse leshome.
O tshwaile puo ya nako e fitileng ya ketelo ya mopresidente Cyril Ramaphosa lebatoweng lena, haene ele e tletseng boikaketso le maka kaha a ile a etsa ditshepiso feela ketelong eo ya hae.
O tiisitse ha dumela hore mokga wa habo o tlo hapa puso le taolo ya lekgotla la motse le MAP mme seo se tlo monehela ho kenya tshebetsong maano a hae a ntshetsopele, botsetedi le kgolo ya moruo.
