Ramotse wa Phethahatso wa Dihlabeng, Tseki Tseki, o qadile lenaneo la hae la Letsatsi la Mandela ka ho aba ditokomane tsa beng ba matlo (title deeds) ho baahi ba Ithoballe, a re beng ba matlo ba busetswa seriti, ba fumana tshireletso ya malapa a bona mme ba haha leruo le tla rua meloko e tlang.
Lenaneo le ile la tswela pele ka metsotso e 67 ya tshebeletso ya setjhaba pele ho Letsatsi la Matjhaba la Mandela, moo Ramotse a ileng a etela lehae la maqheku le ditsi tsa bana le batho ba phelang ka bokowa, a aba dikobo, a lema difate tsa diperekisi le ho theha dirapa tsa meroho.
“Selemo se seng le se seng ka Letsatsi la Matjhaba la Mandela re bontsha mosa ho ba hlokang. Maqheku a rona ke mohlodi wa bohlale, mme re mona ho ba bontsha hore rea ba tsotella,” ho boletse Tseki.
Mookamedi wa Hlokomela Bana Disabled Centre, Joseph Makgabane Rampheng, o amohetse ketelo eo ka thabo, a re bana ba phelang ka bokowa hangata ba a hlokomolohuwa, mme ketelo ya Ramotse e bontsha hore le bona ba bohlokwa.
Kgatiso ka Emily Setona
